عزة راجح
لفيت .. كتير
عزة راجح
تعبت لَفْ على القلوب
يمكن ألاقي طريق خَضَار
يمكن ألاقي الشمس قايمه بتبتسم
ترمي الشعاع .. يطرح نهار
يجذب عصافير الأمل
والحب والخير والعمار
نرجع نعيد سيرة زمان
سيرة الجمال ..
والحب طير باني العشوش
على كل حي
وكل دار
جامع ولادنا بقشته
وف فرشته
عنده الصغار .. زي الكبار
الكل واحد .. لا افترق
ولا يوم زعل
ولا شاف قلق
واما نزل منه العرق
علشان يفرَّق لقمته
ع الأهل .. وفقير حتته
وعلى كل جار ..
كان نن عينه بيبتسم
بصوت جهور لا يتهزم .. هز الجدار
قال المحبة يا بشر
قارب نجاه
واجمل شعار
***************
لفيت كتير
وف كل قلب لقيت صحارى .. رملها
زي الحديد
بيشكلوه أغلال وخوف
وضلوع بتكسرها الظروف
بيشكلوه قسوه .. وبها
يتمد .. يمشي في الوريد
ويروح بعيد
كل القلوب صبحت حجر
صبحت حديد
صبحت سواد
والفقر فارد خطوته
جي من بعيد
جاي شايل الطفل بملامحه
صرخة الجوع ..
والضلوع
تتشق من صوت صرخته
والكل .. عارف حوجته
الكل شايف دمعته
لكن ودان القلب سكت من زمان
ضلف البيبان
علشان ما تسمع صرخته
********
وتعبت لف ..
مفيش خَضَار ؟!
مفيش ورا النبض اللي دابت خطوته
غير العناد
والكبر
أو خوف وانكسار ؟!
طب فين يعيش الطيبين
طب فين يعيش المحرومين
واللي ما كان يوم حلمهم
غير بس ..
قلب ملان خَضَار ..
لوِّن سبيله والمسار ؟!
كانت منذ سنوات ..
![لوحات أدبية ثقافية، في: [ أساليب التعامل السوي ] = 8 =](https://blogger.googleusercontent.com/img/a/AVvXsEhooI4TSRwrBXLCpd44CATARumZvcSIG1VFEqn3SKUGG2FnvBTFXIsIkUKP42KbtlSS6zmqiffYVywzk1NJszW-cevAmiIuUzT2SB8YN74bCJ5WUWFpe1jfWOuZaPu-ZSiQjpU93G_11uBu1elMoGR3v1CZ4uK5hEoRkXOMXJIwCLiZg2aAFoOJrlsN=s72-w186-c-h516)
