محمود عبد المعطي
أنا مش زعلان
أنا مش زعلان
لا انا كنت ف قول الحق جبان
ولا عشت خسيس أراجوز في ميدان
ولا خُنت وبعت زمان بزمان
طب هزعل ليه ؟
هزعل ليه وانا قادر انام واحلم
وأشوف الكون ألوان واللون أكوان
وأغني كمان . على عزف كماااان
وتزور أحلامي عروسة الجان
أخطفها من القصر الملعون
عاشق مجنون .
عايش مفتون .
أنا كنت هكون إيه غير فنان
أنا عاوز بس أعيش إنسان
من حقي أنام والحلم ياخذني
أطير على ظهر حصان
أفرد دراعاتي لحضن أمان
وأفتّح عيني في عين الشمس
أفك قيود اليوم والأمس
أوزّع كل نجوم السما على خلق الله وبعدل الله
ولا نسمع آه .. في بلاد الله
بتقول لله الحب يا ناس
ولا قلب ضناه زمن الحرمان
ولا قلب غواه ع الغدر شيطان
أنا نفسي أعيش عمر الإنسان
أنزل في ميدان العشق أكون سيد الفرسان
أحلم وياخذني الحلم لأرض براح
ما فيهاش أرواح تنداس وضمير بيموت
ولا صوت غربان على شجر التوت
وجراح بتعيش وقلوب في تابوت
وكلاب على باب العمر تفوت
ولا موت يدّن لعذابي أدان
أنا مش زعلان
أنا عايز بس أعيش إنسان
#محمود_عبدالمعطي
