عزة راجح
والله .. عجيب
عزة راجح
والله بجد.. انت عجيب
جيت تِحْمي الفرخه من الخرفان
فرميتها باديك ..
للديب
ودلوقتي.. بالدمع بتبكي
وقاعد مهموم للناس تشكي
لما لقيت نفسك بلا بيضه
ولا حِتِّة لحمه من البيضا
ولا كتاكيت تطلع وتصوصو
تعمل حواليك بهجة وزيطه
وتقولك.. اصبر واستنى
انا بكره هابيض لك ١٠٠ بيضه
تاكل وتبيع وتِقيم حيطة
وتجيب اللحمه وشيكولاته
لولادك ..وتجيب لبهايمك
بدل الغومه ..كمان برنيطه
دلوقتي بتبكي؟!انت عبيط؟!
ما انت اللي عملتلنا شديد
طوَّحت الفرخه بِعزم ما فِيك
على طُول إيدك .. وبعمَى لبعيد
فاخرس بقى.. كُلْ من أفعالَك
وان جاعوا بهايمك وعيالك
و ما فيش يِدَاريك منهم حيط
إغلي لهم ع النار المَيَّه
وقول راح تاكلوا..
بعد شويه
هيناموا ..
وانت اسهر وَلوِل
أو غَنِّي مع السِّت ياريت
بس أقولك سر خطير
الفرخة قويَّه وبتطير
يمكن تلاقيها ف يوم راجعه
وبتضحك وتقول مواويل
وتقولك ولا مليون ديب
يقدروا على فرخه لها حبيب
وانا أحبابي اللي كتير ياما..
مش ممكن عنهم ..
راح أغيب
ولا اخلي إيد الغدر تاكلني
ولا تطمع فيَّه..
ولا تصِيب
يمكن تلاقيها ف يوم راجعه
وتعاهدَك تدِّيك وتعِينك
ماهي ماشيه بحب ..
ف شرايينك
فانت اقضي على ديُول الديب
واحفظها ف قلبك وف عِينَك
واياك تاني ف مره .. تِخيب
![لوحات أدبية ثقافية، في: [ أساليب التعامل السوي ] = 8 =](https://blogger.googleusercontent.com/img/a/AVvXsEhooI4TSRwrBXLCpd44CATARumZvcSIG1VFEqn3SKUGG2FnvBTFXIsIkUKP42KbtlSS6zmqiffYVywzk1NJszW-cevAmiIuUzT2SB8YN74bCJ5WUWFpe1jfWOuZaPu-ZSiQjpU93G_11uBu1elMoGR3v1CZ4uK5hEoRkXOMXJIwCLiZg2aAFoOJrlsN=s72-w186-c-h516)
