مرفت جابر
كلمات مرفت جابر
برغم الأسى
مرفت جابر
برغم الظروف اللي غاويه تعاندنا
ورغم المواجع
ورغم الأسى
مُحال اللي بنّا ف يوم يتنسى
ح تفضل ف قلبي
وتفضل ف روحي
ويفضل غرامك دوايا لجروحي
عشان اللي بنّا ..
ماهوش حب عادي
ولا حتى زايد
دا بركان ح يفضل
بنار الحب قايد
عشان بس يهدا ..
يعوز معجزه
برغم الأسى
ح تفضل جناين عيونك مدينتي
ويفضل نسيمك يحرّك سفينتي
وموجه تاخدني
وموجه تجيبني
ويفضل خيالك قُصادي يشاغلني
وإيدك تشاور تنادي عليّا
أغمّض عينيّا
وافتّح عينيّا
أشوفك ملاكي واشوفني الحوريّه
أعدي الموانع
واعدّي المواني
واضمك بقلبي اللي ف الشوق أناني
وقلبي بنبضُه ف شطّك رسا
برغم الأسى
ظروفنا تعاندنا
نعاند عنادها
ونسرق حياتنا
ف لحظة جمودها
وحتى ف ليالي المطره وبرودها
ملاذنا دفانا
وعشق الليالي
وضحكه ف عيونك خلاص مكتوبالي
ورودنا تفتّح تنتوّر عبيرها
فنشرب سعاده
ونعصر شذى
برغم الأسى
.........................
ديوان خارج التصنيف
***********************
***********************
