مرفت جابر
أسوأ مسرحيّه
كلمات مرفت جابر
................
كل م اضحك ضحكه صافيه
تيجي صوره قُصاد عيوني
تحدف الضحكه الغبيّه
جوّه بير متعبّي عتمه
حتى أخره مالوش قرار
صوره فيها ألف معنى
من معاني الإنكسار
صورة الطفل اللي ماشي
يتسند على ضِل نفسه
جلده مش بيداري عضمه
رغم صغر السن شكله
شيخ عجوز ف الإحتضار
يلسعه البرد اللي حالف
يرعش الإيد الضعيفه
فوق رصيف الإنهيار
كل م ابدأ ضحكه صافيه
بتراودني الصوره واضحه
واللا يمكن صوره فاضحه
للي ف قلوبهم بوار
لمّا حجبوا الشمس عمداً
وامّا حطّوا الورد جهراً
فوق سيوف الإنشطار
دبحوا إحساس البراءه
فوق وشوش أطفال بتجمع
لقمه من كوم الزباله
صوره عامله بجد حاله
فيها إحساس المرار
فصل من تراجيديا سودا
جوّه أسوأ مسرحيه
والبطوله هيّ هيّ
باينه مع رفع الستار
فيها كل دليل إدانه
للعيون الشايفه فينا
والضماير لمّا تبقى
ليل كئيب من غير نهار
وامّا تنشع بالعفونه
وانحطاط كل المعاني
واللي يفضل معنى واحد
هوّ حجم الإنحدار
والغريبه ف كل مرّه
ويّا عرض المسرحيّه
يبقى برّه الكادر خالص
زحمه شبّاك التذاكر
...................................
اكتب تعليقاً