ياريتني كنت حمار ؟ !!!

الرئيسية آراء مجتمع، محمد زهران ياريتني كنت حمار ؟ !!!

آراءمجتمع،محمد زهران

ياريتني كنت حمار ؟ !!!

فريق ألفا تيم

A+ A-

facebook twitter

 

محمد زهران

ياريتني كنت حمار ؟ !!!

النهار ده قلت أروح القهوة بعد صلاة الجمعة أستعيد نشاطي الذهني ؛ لأن القهوة دي مجتمع مصغر ؛ وبتسمع فيها وبتفهم منها مالم تقرأه في الكتب ولا المدارس ولا مدرجات الجامعة ؛ وأنا بطبيعتي كائن اجتماعي ؛ يعني الناس على القهوة بتتكلم في الكورة أقوم داخل عليهم بما كان يجب عليه أن يفعله كولر في مباراة أمس ؛ أو أتكلم عن مكاسب كهربا من تسديد الغرامة بالجنيه المصري بعد أربع سنوات ؛ بيتكلموا عن التموين ؛ أدخل على طول على السكر أبو 27 جنيه اللي ما بنشفهوش غير في السوبر ماركت بـ 55 و 60 جنيه ؛ أو بـ 40 بس تشتري عليه يا علبة جبنة سيئة ؛ يا كيس مكرونة أسوأ ؟ !! ؛ وهكذا في باقي قضايا المجتمع ؛ بداية من الحديث عن رأس الحكمة نهاية برأسي المصدعة ؟ !!! .

المهم أنا دخلت المقهى من هنا لقيت كل الكراسي مليانة عدا ترابيزة واحدة فاضية ؛ لكن جنبها ترابيزة يلتف حولها أكثر من 15 واحد وصوتهم عالي ؛ بيتناقشوا في موضوع ما ؛ فاستأذنت منهم أن أجلس على الترابيزة المجاورة إذا ماكنش عندهم مانع ؛ ربما بيتكلموا في موضوع خاص ومش عايزين حد يسمعه ؛ فوجدت ترحيب من الجميع ؛ وإذا بأحدهم ظهره لي ؛ قال دون أن يلتفت : ده صوت وأسلوب الدكتور محمد زهران !! ؛ قلت له نعم يا أستاذنا ؛ التفت لي وقال لي : أنا مش معلم بس متابعك ؛ ومتابع ما تعرضته له ؛ وبدأ يوجه كلامه للحضور ؛ والراجل كتَّر ألف خيره شكر فيَّ بما فيه الكفاية ؛ وبعدين قال لي : عارف يا دكتور زهران سبب مشاكلك إيه ؟ إن تفكيرك سابق زمانك !! ؛ أنا كنت زيك كده تاعب نفسي وكل حاجة أفكر فيها ؛ وعايز أصلح الكون مش المجتمع وبس ؛ لكن مالقتش فايدة فانسحبت وركنت على جنب ؛ لكن انت بسم الله ماشاء الله عليك : حبس واعتقال وفصل من الخدمة ووقف عن العمل ولسه مستمر ؟ !! .

ثم أضاف أنا بقى بعد ما انسحبت ما فيش مناسبة من المناسبات إلا وأقول فيها ياريتني كنت حمار كنت استريحت ؛ وأصبح مثلي الأعلى راجل فرَّان قريبنا من البلد ؛ الراجل ده جه اشتغل في فرن عيش بلدي قريب من بيتنا ؛ فجه سكن في أوضة عندنا فوق السطوح ؛ كل دوره في الحياة ؛ يصحى من النوم بدري يروح الفرن ؛ طول النهار يخبز وييجي تعبان ياكل أي حاجة وينام ويصحى تاني يوم يعمل نفس البروجرام ؛ ومافيش حاجة في حياته غير إنه يروح طول النهار في الفرن يشتغل وبس وييجي البيت ينام ؛ أنا نفسي أعيش عيشة هذا الرجل ؛ أو أعيش حمار آكل واشتغل وأنام ؛ وما أشغلش نفسي بأي حاجة في البلد ؟ !!! .

دكتور محمد زهران ..

***********************

***********************

الوسوم: آراء مجتمع، محمد زهران