محمد زهران
بس انت ابدأ ومئات الآلاف من المعلمين هيدعموك ؟ !!!
أول ما خرجت من المعتقل بعض الزملاء
المعلمين اقترحوا عليَّ أعمل قناة على اليوتيوب علشان آكل عيش خاصة إن
الوزير كان أنهى خدمتي على مدار سنة ونص قبل الحبس و15 شهر فترة الحبس ؛ ولما أخدت
حكم بالعودة وأنا محبوس رفضوا يستلموا الصيغة التنفيذية من المحامي ؛ ورفضوا دفع
المستحقات المالية عن 27 شهر هي فترة فصلي من الخدمة ظلما من جانب الوزير ؛ يعني
خارج من المعتقل يا مولاي كما خلقتني ؛ فكان من الضروري أشوف أي باب أكل منه عيش ؛
وأنا الحمد لله مارست العمل الصحفي والاعلامي فترة طويلة فاقتنعت برأي الزملاء
وقلت أعمل قناة على اليوتيوب ؛ والزملاء قالوا لي : المعلمين هيشتركوا في القناة
كفاية 500 ألف واحد هتبقى أكبر قناة في التعليم في الشرق الأوسط والزملاء المعلمين
مش هيدفعوا تعريفة كل الموضوع هيدخلوا يعملوا اشتراك وانتهى الموضوع ؛ عملت قناة
على اليوتيوب كل المشتركين على بعضهم 2400 نصهم مش معلمين ؟ !!! ؛ بعض الزملاء
قالوا لي : طيب اعمل قناة على التيك توك أسرع من اليوتيوب وهتبقى منتشر وفلوسها
كويسة والمعلمين هيشتركوا فيها ؛ عملت قناة على التيك توك فيها 1400 متابع منهم 350 معلم - وحياة سيدي اللملومي ؟ !! .
زميلة اقترحت عليَّ أعمل صفحة عامة على الفيس لمناقشة القضايا الاجتماعية
والأسرية بحكم خبرتي في العمل العام والتواصل مع شرايح المجتمع المختلفة ؛وقالت لي
: أمانة عليك يا شيخ ماتجيب سيرة المعلمين ولا التعليم على الصفحة دي ؛ عملت
بنصيحتها صفحة عامة للاستشارات الأسرية وإعلانات الزواج وصلت 37 ألف متابع 90 %
منهم مش معلمين !!! فين النصيحة دي من زمان ؟ !! ؛ يعني المعلمين هم من فعلوا ذلك
بي وبأنفسهم ؛ يعني لم ينصفوني ولم يدعموني ولم ينصفوا أنفسهم .
يعني حضراتكم الاشتراك في قناة على التيك توك أو على اليوتيوب أو متابعة
صفحة على الفيس محتاجة حاجة ؟ !!! ؛ بس شاطرين يقولوا : احنا معاك واحنا وراك وفـ
ضهرك ؟ !! ؛ أتاري بيقولوا : إحنا وراك يقصدوا لحد ما نخلص عليك هههههههههههههه ؛
صحيح شر البلية ما يضحك .
طيب لمن يقولون أنهم لا يعرفون أنني أنِشأت صفحة عامة : رابط الصفحة العامة
في أول تعليق ؛ مش مطلوب من سيادتك غير إنك تدخل تعمل متابعة ولايك للصفحة .
قبل نشر البوست ده كان عدد المتابعين 37 ألف 139 هنشوف عدد المتابعين من
المعلمين بعد البوست بقوا كام .
دكتور محمد زهران ...
