و مين زيِّك ؟!
عزة راجح
أنا زيِّكْ ....
لا عارفه أضحك .... ولا أبكي
ولا عارفه
أمد إديَّه من قلبي
أجيب الفرحه ...
والأحلام
ألونها بلون ... بمبي
ما أنا زيك
دموعك .. دمعتي ف عيني
بتجرحني
وتكويني
أقول أصبر وأستنىَ
في يوم يمكن ... تداويني
ألاقيها
بملح ومر ترميني
وتحرقني
لا منها أهرب .. ولا ألقىَ
قلوب منها تنجيني
ولا باعرف
دموعك إنت دي ولَّاـ
دموعي ومري وأنيني
ما أنا ... زيك
أنا المطحون
أنا المطعون في جنبي
لسه بيرفرف
لا مات ..
ولا عاش عليل صابر
ولا نامت بجرحه عيون
بأقول زيك ؟!
ومين زيك؟!
وفين زيك يا صبح الكون
لا ليكي شبيه
ولا زيك خلق ربي ..
بقلب حنون
في عِز الشدَّه .. ينبض صبر
يرسم م الأنين ... الزهر
ويسجد ليله ... ويصلِّي
ويبقى في السما ... قِمري
ويزرع بين إديكي ... زتون
بحُبْ ... يضم كل الناس
بحُب .. يضم كل الكون
في حضنك ..
كله يتمنى يكون زيك
وزيك ...
عُمْرُه ما هيكون......
***********************
***********************
