عزة راجح
نقول كمان .. ياسيادة الوزير
_________________________
👈يدق ناقوس الخطر هل تسمعه ؟!👉
- التطوير مش ف الاداة مش هتفرق
تاب او كتاب المهم المحتوى والمادة العلمية
- عايزين مناهج صالحة للاستعمال
الادمي في القرن الحالي
- عايزين بنية تحتية فصول آدمية
ومكان لائق يقعد فيه الطالب
وكثافة تتيح للمعلم يهتم بكل الاولاد ويوصل المعلومة
- عايزين معلم مؤهل علميا ونفسيا
يقف بثقة وثبات يعلم ويوصل المعلومة
- عايزين طالب قاعد حابب المكان وحابب يتعلم فعلا
- عايزين سيادتك تحترم المعلم
علشان اولياء الامور يحترموه والطلبة كمان
- يعني عايزين لوائح وقوانين تحكم وتربي
- عايزين نرجع للسبورة اللي الطالب بيخرج يكتب ويجاوب عليها سيادتك مش تخلف
ولا ضد التكنولوجي بالعكس لكل مقام مقال سيادتك " اقرأ وربك الاكرم الذي علم
بالقلم" سيادتك الطلبه خلاص بقوا مش بيفكوا الخط لا قراءة ولا كتابه
- سيادتك عايزين كتاب ورقي طباعة ومحتوى جيد يليق بتربية وتنشئة سوية يمسكه
الطالب يحط خط تحت المعلومة المهمة ويعمل هوامش فيه لان كل الحواس بتشترك في تكوين
الذاكرة
- عايزين سيادتك ترجع حصص الانشطة وتتفعل ويمارسها الطالب فعلا لانها
بتساعد على التوازن النفسي وتكوين الطالب جسمانيا وعقليا شبعنا الاولاد يلموا
الزباله ف حصص النشاط ويجيلهم احباط من المكان اللي مفيش فيه حصص تربي الجانب
النفسي والمعرفي والبدني و..
- عايزين تعين عمال نظافة لان اولادنا يستحقوا يتعلموا ف مكان نظيف مش
يتنفسوا تراب جوا الفصول
- عايزين مدرسه يروحها الطالب وهو سعيد بكل اللي فيها مش كاره يروحها وكاره
يقعد فيها
- عايزين اعلى راتب ف الدولة راتب المعلم ويتعاقب اشد العقاب لو أخطأ
عايزينه واقف آمن على اهل بيته وموفر لهم حياة كريمة علشان يكون عطاءه جزيل وباله
طويل وصبره على اللي بيشوفه من اولادنا
- عايزين حاجات كتير سيادتك
- بكرر دي نقطة فعلا اساس .. عايزينك بجد تعرف ان المدرسة تربية قبل
التعليم ومش هيحصل ده غير لما المعلم ياخد اللي يكفيه حياة كريمة ويتعاقب اشد
العقاب لو اخطأ
سيادتك ..
نقول تاني ...
التعليم = بناء الانسان = بناء الاوطان = أمة حرة قوية لا بتخضع ولا بتنحني
تحيا مصر
نسيت اقول لسيادتك انزل لِم التابلت من على ماركت بلاس وشوف الطلبه بتبيعه
بكام
دي فلوس كان ممكن تاسس بها مدارس صح وتخفف كثافة الفصول لكن نقول ايه
سيادتك ٤ سنوات لم يستخدم التاب ولم يستغل خارج او داخل المدرسة
يعني اهدار للمال العام
ونتائج الطلبة خلال ٤ سنوات لم تكن واقعية ولا منطقية
سيادتك اقل تهم ممكن توجيهها اليك
_ اهدار مال عام
_ وافساد للعملية التعليمية
_ وازعاج اولياء الامور بكل السبل والقرارات المتناقضة المتضاربة
الطالب كان ممكن يفتح بنك المعرفة من فونه او شاشة الكمبيوتر اللي ف بيته
او من السايبر اللي بيهرب من المدرسة ويروح يقعد يشيش فيه ويلعب جامز
كمان تمن الشبكات اللي مدتها للمدارس ولم تستخدم حتى الان كنت عين معلمين
وعمال نظافه بالفلوس دي سيادتك
فيه اوليات واساس ياافندم لما بيقع بتنحدر المنظومة
عارف سيادتك ان النت ف مصر ومهما
عملت لا ولن يستوعب
وعارف ان المعلم غير مؤهل لاستخدام التاب داخل الفصل
- سيادتك لا درست ولا خططت ولا اعديت وجهزة البنية التحية والمعلم
والمكان قبل ما تعمم التجربة
المؤلم بتغالط نفسك وتقول نجحت التجربة
المؤلم اعترفت ان منهج الرابع الابتدائي محتاج ١٨٠ يوم وعندنا كل المدة ١٠٠
وبس
كنت فين قبل التطبيق سيادتك
وليه دايما تكتشف الخطا متأخر " لان مفيش منهج علمي تدرس به قبل
التطبيق اكيد "
حضرتك ما سمعتش عنه
احنا مش حقل تجارب حضرتك
حضرتك حتى مش بدأت من حيث انتهى الاخرون
لازم نعيد التجارب ونفشل ؟
تحيا مصر
