الرئيسية صحة منوعات ظاهرة تركيب السيراميك في الأسقف وخاصة أسقف الحمامات والمطابخ

ظاهرة تركيب السيراميك في الأسقف وخاصة أسقف الحمامات والمطابخ

وليد عبد اللطيف

أنتشرت الأيام دي ظاهرة بسبب الصنايعية وهي أن سقف المطبخ والحمام يكونوا سيراميك الموضوع ده هيكون منتشر في الريف أكثر من المدن

ومش معني ان في ناس كتير مركبه سيراميك في السقف بقاله سنين محصلش فيه اي مشاكل يبقي تركيبه صح وآمن

أحب بس أوضح أن مفيش أي متخصص بيوافق علي الكارثة دي

أه بقول عنها كارثة لعدة أسباب :-

أولاً : هو ضد قواعد الأمان والسلامة في البيت تخيل حضرتك مركب حاجة تقيلة عكس جاذبية الأرض.

ثانياً : لو أنت مش أخر دور وحصل تسريب من الدور اللي فوق وده وارد جداً مش هتحس غير لما السقف يوقع عليك لأنه مش باين وأنت مش شايف.

ثالثاً : سواء حضرتك دور أخير أو لا فكر كده لو واحدة من السيراميك دي أتفكت ووقعت فوق طفل موجود أو حد كبير دي ممكن تقتله لا قدر الله.

رابعاً : ترسب الأدخنة والبخار الناتج عن عمليات الطبخ أو إستخدام السخان علي المدى البعيد ممكن يخلي السيراميك يفك من مكانه ويوقع.

خامساً : عامل التمدد والأنكماش بمادة السيراميك من الحرارة الداخلية والخارجية.

ده غير أن موضوع تركيب السقف سيراميك ده لا موجود في أي كتب ليها علاقة بالتصميم أو الديكور علمياً ، ولا فيه أي نوع من أنواع الفن مع إحترامي للناس اللي عامله كده بالفعل.

الحل الوحيد للحمام الحوائط سيراميك والسقف جبيسيوم بورد أخضر اللي هو مقاوم للرطوبة وده مش في كل الحالات أو مصيص عادي مع كورنيشه فيوتك رقيقة.

وموضوع أصل السيراميك أسهل في التنظيف ، رأيي الشخصي طبعاً إني أتعب في المحافظة علي النظافة شوية ولا إني أعرض نفسي وأهل البيت للخطر ...

أخيراً السيراميك ف الأسقف مرفوض شكلاً وموضوعاً مع كامل احترامي لآراء الغير

وليد عبد اللطيف

***********************

الوسوم: صحة منوعات

وصف المدون

إعلان

عاجل