لمياء الباسل : لماذا لماذا لا
تتقدم الدول الناطقة بالعربية؟؟
طول حياتي من وانا طفلة اتربيت
مع ام وأب فيهم طيبة الدنيا وكانوا عايزينا نطلع احسن ذرية زي كل الأباء والأمهات،
كانوا بيعملوا ده بالنصح والارشاد والاهتمام، لكني اكتشفت لما كبرت انه ده مش المطلوب....
المطلوب نساعد أولادنا يفهموا
حكمة الحياة بأننا ننمي مهاراتهم (كتير جدا مهارات اهمها التفكير النقدي)، ونفتح لهم
كل الأبواب اللي تساعدهم ونيسر لهم أدوات تعينهم.
يعني الأول يفهموا جدا دستور
الحياة، اضمن شيء يكون من الكتب السماوية الموثقة، مش فقط نستسهل وناخدها من اي مفكر
او عالم، لأنه هو لما أعطانا عصارة فكره ده عشان نستفيد ونسترشد لانه مهما كان هو إنسان
ليه إمكانيات في التفكر والاحساس والخلفيات وده اكيد بياثر على افرازه لنا في النهاية.
مش بااقول لاتلتفت ونبدأ من الصفر بافتكاسه خطرت على بالنا 😀لأ خالص.
طيب امال يفهموا دستور الحياة
منين وازاي؟ زي ماقولت اضمن شيء من الكتب السماوية الموثقة، بما اني مسلمة ها اقول
القرآن. علما بأني لااتحدث من وجهة نظر دينية.
احكي لكم حاجة لطيفة، كنت زمان
لما اسمع القرآن، لا أفهم الا القليل وبالنسبة لي الباقي طلاسم، ايه ده؟ يعني ايه؟
وايه علاقته باللي احنا فيه، وايه المفردات اللغوية الصعبة دي، لاتعني شيء بالنسبة
لي، مش فاهمة الشفرة، مش قادرة افكها وطبعا لا افقها (من الفقه).
لما انجبت أطفالي، حاولت اجيب
لهم شيخ يحفظهم القرآن زي ما البيوت المتدينة بتعمل، وعشان احساسي ان ده شيء مهم ولكني
لم افلح ابدا، كل مره لا يتم الموضوع، زعلانة من نفسي جدا، كل حاجة تربي وتنمي أولادي
عملتها اشمعنى ده؟ ، دايما ألوم نفسي.(عندي تحفظ شديد على تحفيظ القرآن بدون فهم)،
لكني فهمت ليه، النقص كان داخلي، ما كنتش فاهمة زي ما باقول لكم ايه الحكم اللي في
القرآن، ولكني لما بدأت اقرا تفاسير واهتم اني افهم، وجدت انه إعجاز زي ما كل العلماء
بيقولوا. فاهمة ان ده مش جديد، بس والله كتير بنقرا أراء وحكم من قبلنا ونعجب جدا ونمصمص
شفايفنا ونتصعب واحنا لم يصل لنا منها الا نسبة قليلة ولم نقتنع ونعي ونفقه ( من الفقه).
المهم، (اسفة أطلت عليكم)،، لما
فهمت معاني الكلمات في القرآن، وبما اني تربوية واصلا معلمة لغة انجليزية، حسبنت على
المسؤلين عن اللغة العربية وتعليمها في بلادنا. طبعا اكيد هما فاهمين كل اللي قولته
ده ومش غريب عليهم، وممكن يكون فيه توجهات لتعسيير الأمر (اقصد اننا نفهم مفردات لغتنا
للأجيال ليستقيم تفكيرهم). واكيد فيه فهم سطحي ان كل من يقرأ ويكتب هو متعلم للغة العربية،
وحتى الإعلاميين والمثقفين التي تعتبر اللغة اداتهم في عملهم، لا نجزم انهم يفقهوا
معاني المفردات في اللغة العربية حقا. اقول لكم شيء،،، اظن ان معظم الاختلافات الطاحنة
والمشتتة لنا من خلال الفتاوى الدينية تأتي من عدم الفهم الكامل والإلمام بجميع معاني
اي مفردة وسياقاتها والخلفية الثقافية والمجتمعية والدينية من ورائها على مر العصور.
اختصارا لكل ما تحدثت فيه✋،
فكرتي المتواضعة اننا لابد أن
نعلم أطفالنا معاني الكلمات والمفردات اللغوية للغة العربية بكل الوسائل الشيقة والممتعة
وايضا باستخدام التكنولوجيا المبهرة، لأن هذا سيقدم حلول لكل شيء سيء نواجههه هذه الأيام،
سنساعدهم على فك الشفرة وفهمهم لمفردات اللغة العربية ليستقيم فكرهم ويستطيعوا تقليل
الفجوه بين دينهم وتعاليمه وكتبهم السماوية من جهه وبين حياتهم العملية من جهة أخرى.
وربما نجد إجابة عن سؤال صعب
جدا، لماذا لا تتقدم الدول الناطقة بالعربية؟؟ الإجابة لأنها لاتفهم ولاتفقه المرجع
الأساسي الذي وهبهم الله لهم وهو القرآن الكريم.
ملحوظتان اخيرتان
- اعتذر عن أخطائي اللغوية لاني
غير متخصصة
- التنفيذ سهل مش محتاج مؤسسات
ولا تطوير تعليم ولا مناهج ولا قرارات كبيرة. ممكن اي ولي أمر في مكانه ينفذه (اقصد
الاهتمام بتعلم المفردات اللغوية وفهمها في سياقات مشوقة وممتعة للمساعدة في فهم دستور
الحياه).
***********************
***********************
