15 حاجة لازم تبطل تعملها
مهم جدا تتخلص من عيوبك ،وتقيم نفسك ،علشان تقدر تخفف من الضغوط اللي بتواجهها في حياتك ، علشان كد ه (15 )حاجة لازم تبطل تعملها، وهى :
1- بطل تعاقب نفسك على أخطاء الماضي:
إللي حصل حصل خلاص، ما فيش حاجة ممكن ترجع الزمن أو تغير الماضي، الحاجة الوحيدة في إيدك إنك تتعلم ما تغلطش نفس الغلط تاني وتتعلم إزاى ممكن يفيدك في مستقبلك إنما عقاب نفسك بقية حياتك على أخطاء قديمة مش هيحل ولا هيضيف حاجة.
2- بطل تخاف تغلط:
كلنا غلطنا في مرحلة ما في حياتنا وهنفضل نغلط لحد ما نموت ما تخافش تغلط .. خاف تندم إنك ما حاولتش.
3- بطل تحاول إنك تشتري السعادة:
السعادة غريزة أساسية، ما بتجيش غير من جواك .. ما فيش حاجة ولا حد في الدنيا ممكن يخليك سعيد لو أنت مش سعيد من جواك.
4- بطل تتمسك بالماضي على حساب مستقبلك:
الماضي عامل زى مراية السيارة .. لازم كل شوية تبص تتأكد إنك ماشي صح .. بس لو ركزت فيه زيادة عن اللزوم مش هتشوف أنت ماشي فين ولا إيه إللي جاى في وشك.
5- بطل تدي الناس مساحة إنها تتحكم بمشاعرك:
الأسهل من إن الإنسان يغير من نفسه إنه يحاول يغير الناس علشان تمشي على مزاجه، إنت عملت كده مع غيرك وغيرك بيعمل كده معاك سواء قاصد أو لأ، سواء بنية كويسه أو لأ، ما تسمحش لحد إنه يتحكم في مشاعرك .. عيش زى ما أنت عايز تعيش، مش زى ما الناس عايزاك تعيش.
6- بطل تُدخل علاقات للأسباب الغلط:
كلنا بنمر بضغوط في الحياة بأشكال مختلفة (أسرية، عائلية، مادية، اجتماعية، نفسية، وظيفية، جنسية، …) ، بس الدخول في العلاقات “بسبب” الضغوط دي يبقى هروب من المشكلة إللي إنت فيها بمشكلة أكبر، لو مش مقتنع تماما بعيد عن أى ضغوط إن الطرف التاني هو نصك التاني، نصيحة.. ما تدخلش.
7- بطل تمشي مع التيار:
ماشي مع التيار يعني ما عندكش خطة لحياتك، بتصحى تروح الشغل وترجع تنام علشان تصحى تروح الشغل إللي إنت غالبا مش طايقه بس مضطر، بتخرج مع ناس لمجرد إنك تعرفهم من زمان أو مضطر تخرج معاهم حتى لو ما بتبقاش مسبوط ولا على راحتك وأنت معاهم، فيه حاجات كتير ممكن تبقى مضطر تعملها لاعتبارات معينة، بس مش معنى كده تعتبر إن الاضطرار ده هو حياتك، لازم يبقى ليك خطتك في الحياة ورؤيتك الخاصة بيك .. مش كل إللي بينفع الناس بالضرورة ينفعلك ولا كل إللي بيبسط الناس بالضرورة بيبسطك.
8- بطل تقارن نفسك بحد:
كل واحد فينا له تجربته في الحياة، وما فيش تجربة ولا حياة بتتطابق بين اتنين أبدا، يعني ما ينفعش يبقى حد شبه التاني في كل حاجة وهو دا سر تميزنا، يعني إنت في حد ذاتك مميز ومختلف عن أى حد، ومش شرط إللي ينفع ناس معينة ينفعلك إنت كمان، دور على إللي ينفعلك إنت .. حاجة تكون بتاعتك إنت.
9- بطل تحاول تبقى مثالي:
عمر ما هيكون أى شخص في الدنيا مثالي وألا ما يبقاش فيه معنى للحياة، طول ما احنا عايشين بنتطور، والتطور عمره ما هيخلص، بدل ما تحاول تبقى مثالي،حاول تبقى إنسان أحسن من اليوم إللي قبله، وده كفايه أوي.
10- بطل يفرق معاك كلام الناس:
كل واحد بيشوف الحياة من وجهة نظره هو، يعني أى شخص هيقولك رأيه في حياتك، بيقولها لو هو إللي كان مكانك بظروفه الحالية كان عمل إيه، وبالتالي النتيجة هتبقى مختلفة تماما عن واقعك إنت.
11- بطل تحاول إنك تبقى شخص تاني غير نفسك:
ما تحاولش تبقى أى حد تاني غير نفسك لأنك حتى لو تصورت إنك نجحت تبقى زى شخص تاني، فهتبقى مجرد نسخة مكررة أو بهتانه منه، إنما ممكن تكون أحسن من الشخص إللي إنت عاوز تبقى زيه لو بس اشتغلت على نفسك، ممكن تشوف الصفات إللي إنت عاوزها تبقى فيك وحاول تحسنها من غير ما تقلد حد.
12- بطل تهرب من مشاكلك أو مسؤولياتك:
المشاكل والمسؤوليات اللي بتمر علينا في حياتنا مش مهمتها إنها تنغص علينا حياتنا، هدفها تخلينا نتطور للأحسن، تخيل حياتك لو ما حصلش فيها المشاكل أو المسؤوليات إللي عدت عليك، كنت هتبقى بنفس القوة والإدراك إللي إنت عليهم دلوقتي؟!، لو مش قادر تحس بالفرق إللي شكلته مشاكلك وتأثيرها في حياتك يبقى إنت ما اتعلمتش إللي المفروض تتعلمه من المشكلة إللي (كنت) فيها، وبالتالي هتفضل تلف في دواير مفرغه ما بتخلصش ولا بتعرف تطلع منها، قرارك إنك تواجه المشكله هو 90% من حلها .. الباقي إنك تواجه فعلا.
13- بطل تعمل حاجة لمجرد إنها عادة:
لو الحاجة إللي بتعملها مش بتبسطك .. بطلها، طبعا فيه حاجات مش هينفع تبطلها بالسهولة دي، فكر إزاى هتقدر تبطلها على المدى القصير أو الطويل، المهم لو مش بتبسطك .. بطلها.
14- بطل تدافع عن نفسك قدام الناس:
اللي عايز يصدق كلامك .. هيصدقك، وإللي مش عاوز يصدق كلامك هيفضل مش مصدق، وإللي عاوز يستفهم منك هيسألك، ما تشغلش بالك كتير، كل واحد هيشوفك بالشكل إللي هو عايزه بغض النظر عن رأيك إنت.
15- بطل تبص على إللي في إيد الناس:
“لو فرضنا إن نعم الله اللي مالهاش عدد تساوى 24 قيراط، هتلاقي كل إنسان واخد الـ 24 قيراط بتوعه كاملين بس واخدهم مشكلين، هتلاقي اللي واخد 10 قيراط مال + 7 صحة + 1 زوجة صالحة + 2 علم + 4 راحة بال، وهتلاقي غيره واخدهم كلهم برضو بس بشكل مختلف، بس كله واخد الـ 24 قيراط
***********************
***********************
